1Und weiter grödt dyr Elihu:

2"Ös Weisn, ös, hoertß meine Worter! Ös seitß de Gscheidn; lostß myr zue!

3Denn s Oorn prüefft und burtlt Worter, yso wie d Speisn schmöckt dyr Gaim.

4Ietz forsch myr naach, was recht und guet ist! Tuen myr üns zamm; dös ghoert ietz klaert!

5Dyr Hieb haat gsait: 'Nän, i bin schuldloos; mir haat dyr Herrgot s Recht entzogn.

6Zwö soll i liegn mit rainen Gwissn? Er haat mi einhintaucht aan Grund.'

7Daa mueß i schoon sagn, örger geet s nit! Dyr Hieb, der löstert, was grad geet.

8Der stöllt si auf ain Stueff mit n Gsindl; mit Fräfler macht dyr Hieb si gmain.

9Haat er nit gsait: 'Was bringt ainn d Frummet? Bei n Herrgot ist dös nit dyrkennt.'?

10Drum lostß myr zue; villeicht seitß gscheider: Dyr Herrgot tuet nix Unrechts nit. Dyr Allmächtig taet niemaals fräfln.

11Er straafft önn Menschn, wie yr s braucht. Der kriegt grad dös, was er verdient haat.

12Nän, Unrecht tuen pässt nit zo iem. Und s Recht beugt dyr Allmächtig aau nit.

13Wer haet yn n Herrgot d Erdn göbn? Wer haet dönn gantzn Erdkraiß hingstöllt?

14Und wenn yr niemer möget, 'Aus!',

15was mainst, wie schnell däß s Löbn dyrhin wär, wie schnell dyr Mensch wär zfalln zo Staaub?!

16Du bist doch bloed nit, also lustert; ietz mech i dir aynmaal öbbs sagn!

17Wer s nit mit n Recht haat, kan nit reichnen. Önn Allgrechtn mechst du verklagn?

18Er staucht aynn Künig zamm, wenn s sein mueß, und beutlt Gwäpplte gscheid her.

19Ayn Fürstnrang zölt bei iem gar nit, nit meerer wie dyr minste Mensch. Sö seind ja all aus seiner Werchstat;

20und kaaum däßst schaugst, daa seind s schoon gstorbn. Kan sein, däß s bei dyr Nacht eyn d Frais fallnd. Wer non so starch gwösn ist, schiebt ab.

21Er wacht önn Wög von iedn Menschn; er seght dyrvon aynn iedn Schrit.

22So dunkl kan kain Finster sein nit, däß si ayn Lump verkriechen kännt.

23Dyr Herrgot braucht nit eerst ayn Tagding; daa werd glei gurtlt, daa geit s nix.

24Aau Hoehste sturtzt dyr Herrgot fredig, schiebt Anderne an iener Stöll.

25Er waiß s ja ee, was die allss taan habnd; bei Nacht und Nebl raeumt yr s wögg.

26Yso kriegnd s d Straaff für ienern Fräfl; er schaugt schoon, däß s ayn Ieder seght.

27Dös habnd s dyrvon, däß s iem nit treu blibnd und däß sein Wög ien nix gabdeutt.

28Er lost schoon drauf, wenn Minste rueffend. Önn Schrai von n Nootign hoert yr wol.

29Doch aau wenn nit, wer kännt n packen? Wer waiß s denn, wo yr netty ist? Und zamtdönn herrscht yr über n Erdkraiß.

30Er haut de Brems ein, wenn s is z arg treibnd, de Gotloosn. Daa rött yr s Volk.

31Ja, mainst, dyr Herrgot müesset kemmen: 'I haan aynn Schmarr gmacht, tuet myr laid!

32I sag dyr s glei, daa muesst myr helffen; dann böglt i s aau wider aus!'?

33Naach deiner Pfeiff sollt er drum tantzn? Ja, sag s halt glei, dös haast doch gmaint?

34Allss, was non um ayn Fümferl Hirn haat, Verständdliche von ee, die sagnd:

35'Bei n Hieb haat s scheint s ietz völlig ausgsötzt; yso ayn Käs, was der verzäpft!

36Na guet, dann ghoert iem aau nit meerer; zwö löstert yr yso dyrher?

37Ayn Sünder, und dyrzue non frech sein! An n Herrgot laast yr kain guets Haar.'"